Bordi i Transparencës vendos çmime të reja për karburantet, nafta shkon 224 lekë për litër, benzina 181 lekë

Bordi i Transparencës ka miratuar këtë të premte çmimet e reja tavan për shitjen e nënprodukteve të naftës në vend, duke reflektuar edhe uljen e fundit të akcizës me 20%.

Sipas vendimit, çmimi i shitjes me pakicë për gazoilin (standard SSH EN 590) është përcaktuar të jetë jo më shumë se 224 lekë/litër, ndërsa ai me shumicë jo më shumë se 212 lekë/litër. Autoritetet bëjnë të ditur se ulja e akcizës, së bashku me efektin e TVSH-së, përkthehet në një reduktim prej rreth 9.5 lekë për litër.

Ndërkohë, për benzinën, çmimi maksimal me pakicë është caktuar 181 lekë/litër, ndërsa me shumicë 169 lekë/litër. Vendimi hyn në fuqi menjëherë, duke nisur nga ora 20:00 e datës 3 prill 2026, dhe do të mbetet në fuqi deri në mbledhjen e ardhshme të Bordit, ku do të reflektohen ndryshimet e reja të tregut.

Bordi i Transparencës u ka bërë thirrje të gjithë operatorëve të tregtimit me shumicë dhe pakicë të karburanteve që të zbatojnë me përpikëri çmimet e përcaktuara. Në të kundërt, paralajmërohet se shkeljet do të shoqërohen me masa të rrepta, deri në pezullim të aktivitetit.

Ministria e Ekonomisë dhe Inovacionit, në bashkëpunim me Ministrinë e Financave dhe Ministrinë e Infrastrukturës dhe Energjisë, theksojnë se mbeten të angazhuara për mbrojtjen e konsumatorëve dhe garantimin e konkurrencës së ndershme në treg.