Sipas informacioneve paraprake, të ndaluarat janë drejtoresha e filialit të Postës së Durrësit, Elisabeta Mataj, drejtuesja e sektorit të financës, Valbona Hoti, si dhe arkëtarja Paola Dana.
Prokurori G. Frëngu, në bashkëpunim me strukturat e Policisë së Shtetit, ka nisur veprimet procedurale ndaj tre punonjëseve, të dyshuara për shkelje detyre dhe parregullsi në administrimin e vlerave monetare.
Rasti u zbulua pas një kontrolli të brendshëm në filialin e Postës Shqiptare në Durrës, ku u evidentuan mungesa të konsiderueshme financiare. Pas konstatimeve, drejtoresha e filialit u shkarkua nga detyra, ndërsa drejtuesja e sektorit financiar dha dorëheqjen.
Në një njoftim zyrtar, Posta Shqiptare bëri të ditur se verifikimet e kryera evidentuan parregullsi dhe shkelje në administrimin e fondeve që lidhen me shërbimin e pagesave. Institucioni deklaroi se ka marrë masa ndaj punonjëseve përgjegjëse dhe e ka referuar çështjen pranë Prokurorisë.
Hetimet vijojnë për të zbardhur rrethanat e plota të ngjarjes dhe për të përcaktuar përgjegjësitë ligjore të personave të përfshirë.
Elisabeta Mataj ishte emëruar në drejtimin e Postës së Durrësit në tetor të vitit të kaluar, duke zëvendësuar Etleva Budinin, e cila më pas mori mandatin e deputetes së Partisë Socialiste.
