Rama i prerë, nuk e heq taksën e qarkullimit: Le të rritet çmimi i naftës

Ndërsa çmimi i naftës në Shqipëri u shtrenjtua menjëherë pas konfliktit në Lindjen e Mesme, kryeministri Edi Rama nuk u shfaq i shqetësuar për këtë fakt, duke e cilësuar si rritje të moderuar. Gjatë takimit me furnizuesit e naftës, Rama nuk njoftoi asnjë masë konkrete për kontrollin e çmimit të naftës, ndërsa u shfaq sërish i vendosur për të mos pezulluar taksën e qarkullimit, që e bën Shqipërinë vendin me çmimin më të lartë të naftës në rajon.

Kryeministri Edi Rama nuk është shprehur i shqetësuar për rritjen e çmimit të naftës në Shqipëri, duke e cilësuar si të papërfillshme rritjen që ka pësuar çmimi i karburanteve pas shpërthimit të konfliktit në Lindjen e Mesme. Gjatë një takimi me furnizuesit e naftës, Rama e cilësoi të panevojshme marrjen e masave për kontrollin e çmimit të naftës në vend.

Ashtu si në situata të mëparshme, kryeministri është shprehur kategorikisht kundër uljes ose pezullimit të taksave të përfshira në çmimin e naftës, përfshirë taksën e qarkullimit. Ai justifikoi edhe arsyet e këtij vendimi dhe të kësaj takse, që vendet e tjera nuk e aplikojnë.

Që prej shpërthimit të konfliktit në Lindjen e Mesme, qytetarët u përballën me një rritje të menjëhershme të çmimit të karburanteve, ndërkohë që Shqipëria aktualisht ka çmimin më të lartë të naftës në rajon dhe ndër më të lartët në Evropë.