Gazetari Adriatik Doçi kallëzon në SPAK Agron Shehajn: Pikëpyetje për vilën 15 milionë euro dhe transaksionet në Itali!
Gazetari Adriatik Doçi ka depozituar një kallëzim penal në Prokurorinë e Posaçme kundër deputetit dhe kryetarit të Partisë Mundësia, Agron Shehaj.
Në kallëzimin e datës 30 korrik 2026, Doçi kërkon që SPAK të verifikojë Shehajn për veprat e dyshuara penale të deklarimit të rremë ose fshehjes së pasurisë, fshehjes së të ardhurave dhe pastrimit të produkteve të veprës penale. Akuzat e ngritura në dokument përbëjnë pretendime të kallëzuesit dhe ende nuk janë provuar nga organet e drejtësisë.
Kallëzimi mbështetet në analizën e deklaratave të pasurisë së Shehajt për periudhën 2021–2025, si dhe në dokumente kadastrale, tregtare dhe financiare që lidhen kryesisht me pasuritë dhe veprimtarinë e tij ekonomike në Itali.
Doçi pretendon se në deklaratat periodike nuk rezulton i individualizuar një investim prej rreth 4 milionë eurosh, i përmendur publikisht si shpjegim për rindërtimin, zgjerimin dhe rritjen e vlerës së pronës. Sipas tij, dokumentacioni kadastral italian tregon se vila ka sipërfaqe totale 459 metra katrorë, ndryshe nga sipërfaqja prej 251 metrash katrorë e pasqyruar në formularët e deklarimit.
Një tjetër element i ngritur në kallëzim lidhet me pronësinë e vilës. Sipas dokumenteve italiane të cituara nga Doçi, Shehaj rezulton se është bërë sërish pronar i saj më 7 korrik 2026, më pak se dhjetë muaj pasi kishte deklaruar shitjen për 15 milionë euro. Kallëzuesi kërkon që të verifikohen kontrata e shitjes, ajo e riblerjes, identiteti i palës tjetër, çmimet reale dhe mënyra e kryerjes së pagesave.
Doçi ngre pikëpyetje edhe mbi një sërë të ardhurash dhe transaksionesh milionëshe të deklaruara me përshkrime të përgjithshme, si “të ardhura të tjera”, “të ardhura” ose “shitje asetesh”. Sipas kallëzimit, për shuma që arrijnë në rreth 3.9 milionë euro gjatë viteve 2021–2025 nuk është individualizuar në formularët publikë burimi konkret, subjekti pagues apo marrëdhënia juridike që ka prodhuar pagesën.
Në dokument përmenden gjithashtu një kredi bankare prej 2.6 milionë eurosh, shlyerja e një detyrimi prej më shumë se 3.6 milionë eurosh, huadhënie në vlera milionëshe dhe blerje të reja pasurish në Itali. Kallëzuesi kërkon që këto lëvizje të shqyrtohen së bashku përmes dokumentacionit bankar, tatimor dhe tregtar në Shqipëri dhe Itali.
Doçi i kërkon SPAK-ut regjistrimin e procedimit penal dhe administrimin e kontratave të shitblerjes, dokumenteve kadastrale, ekstrakteve bankare, deklaratave tatimore, kontratave të kredisë dhe dokumentacionit të punimeve në vilë.