Egnatia në limite, superkompjuteri parashikon fatin e rrogozhinasve në Conference League pas humbjes europiane
Kampionët e Shqipërisë po kalojnë një moment delikat në aventurën europiane. Humbja e fundit ka ndikuar në parashikimet statistikore, ndërsa Egnatia rrezikon të mbetet jashtë fazës me eliminim direkt. Megjithatë, shanset për të vazhduar garën mbeten ende të hapura.
Egnatia po përjeton një aventurë me ulje-ngritje në UEFA Conference League. Skuadra nga Rrogozhina kishte nisur me pretendime për të bërë histori në Europë, por rezultatet e fundit kanë komplikuar objektivin e kualifikimit.
Pas barazimeve në dy ndeshjet e para, përballja efundit ka sjellë një tjetër goditje për ekipin shqiptar. Tashmë vëmendja është përqendruar te simulimet e superkompjuterit dhe mundësitë reale që Egnatia të vazhdojë rrugëtimin në kompeticion.
Çfarë thotë superkompjuteri?
Sipas platformës Football Meets Data, Egnatia ka ende mundësi për të përfunduar mes 24 skuadrave të para, pozicion që siguron pjesëmarrjen në fazën play-off.
Një tjetër model statistikor, Football and Math, e projekton Egnatian me 69% mundësi për të përfunduar në vendet 9-24, ndërsa shanset për eliminim pas fazës së ligës vlerësohen në 29%. Vetëm 2% janë mundësitë për të hyrë direkt në 1/8-at e finales.
Këto janë simulime statistikore dhe jo rezultate të sigurta, por tregojnë se skuadra e Rrogozhinës ka ende një rrugë për të shpëtuar aventurën europiane.
