Bujar Leskaj : 𝗠𝗯𝗲𝘀𝗵𝘁𝗲𝘁𝗷𝗲 𝗻𝗴𝗮 𝘁𝗲 𝗴𝗷𝗶𝘁𝗵𝗲 𝘀𝗵𝗾𝗶𝗽𝘁𝗮𝗿𝗲𝘁 𝗽𝗲𝗿 𝗽𝗿𝗼𝘁𝗲𝘀𝘁𝘂𝗲𝘀𝗶𝗻 𝗶𝗻𝘁𝗲𝗹𝗲𝗸𝘁𝘂𝗮𝗹 𝗺𝗼𝗱𝗲𝗹 𝗚𝗲𝗻𝘁 𝗣𝗿𝗼𝗴𝗻𝗶!

Nga Bujar Leskaj.

Në ditën e 58-të të protestës qytetare, ata që meritojnë nderimin dhe mbështetjen më të madhe janë qytetarët e lirë të këtij vendi që për 58 ditë me radhë, kanë qëndruar pa u ndalur në sheshet dhe rrugët e Tiranës, duke protestuar për kërkesat e tyre, kërkesa tërësisht të drejta dhe legjitime.

Dita e djeshme shfaqi deformimet institucionale të forcës qeverisëse në pushtet, të regjimit 13 vjeçar të sektit Rama. Ky regjim autokrat u shfaq në formën e tij më represive, përmes dhunës dhe urrejtjes ndaj qytetarëve dhe protestës së tyre, e cila për 58 ditë ka qenë tërësisht paqësore, e drejtë dhe demokratike. Policia, me urdhër të Edi Ramës, ushtroi dhunë ndaj protestuesve, kreu shoqerime të pajustifikuara dhe ndërmori veprime intimiduese ndaj pjesëmarrësve në protestë. Akti më i rëndë, ishte nxjerrja e një mjeti prerës ndaj njërit prej aktivistëve më të spikatur të protestës, Gent Prognit, duke përbërë një cenim të rëndë të rendit demokratik, të lirive dhe të drejtave themelore të njeriut. Gent Progni përfaqëson prej vitesh një zë të spikatur në denoncimin e korrupsionit qeveritar. Ai éshtë një nga drejtuesit dhe aktivistët më të palodhur të kësaj proteste qytetare përgjatë 58 ditëve, ndërsa është i mirënjohur edhe si një talent i spikatur në fushën e IT-së. Dhuna e ushtruar ndaj tij dhe tentativa për ta sulmuar me mjet prerës nga një punonjës policie patronazhist dëshmon një klimë të rrezikshme represioni politik dhe ngre dyshime të forta mbi përgjegjësinë e atyre që kanë urdhëruar ose lejuar një sjellje të tillë.

Si deputet i Vlorës, dënoj me forcë dhunën e ushtruar nga policia ( segmente të vecanta)mbi protestuesit përpara Kuvendit. Forcat e rendit duhet të jenë në krah të qytetarëve që protestojnë dhe jo në shërbim të sektit grabitqar Rama.

Nën presion janë vënë edhe drejtues dhe zëra të tjerë të spikatur të kësaj lëvizjeje qytetare, si Edviol Kulluri,Edison Lika, Genc Shehu, Arben Kola dhe të tjerë, ndaj të cilëve është ngritur një numër i madh akuzash penale, për shkakun e vetëm se kanë protestuar. Kjo, sipas protestuesve, dëshmon frikën dhe rrënimin e një regjimi që kërkon të mbijetojë përmes represionit e dhunës.

Ndërhyrjet e dhunshme të segmenteve te veçanta të policisë ndaj protestuesve kanë thyer çdo standard të mbrojtjes e respektimit të të drejtave dhe lirive të qytetarëve, duke cenuar parimet themelore të shtetit të së drejtës dhe çdo normë morale e institucionale.

Një demokraci nuk matet nga mënyra se si trajton mbështetësit e pushtetit. Ajo matet nga mënyra se si trajton kritikët e tij. Pikërisht në momentet kur qytetarët protestojnë, institucionet provojnë nëse janë në shërbim të ligjit apo të interesave politike.

Shqipëria nuk ndërtohet duke heshtur përballë dhunës ndaj protestuesve. Shqipëria ndërtohet duke mbrojtur ligjin, dinjitetin e njeriut dhe të drejtën e çdo qytetari për të folur, për të protestuar dhe për të kërkuar llogari, pa frikën e represionit dhe të shkopit të forcave policore.

Nëse forca përdoret kundër qytetarëve që protestojnë në mënyrë paqësore, atëherë nuk dëmtohen vetëm ata që ndodhen përballë Kuvendit. Dëmtohet besimi te shteti, dobësohet demokracia dhe vihet në provë autoriteti moral i institucioneve ligjzbatuese.

Mesazhi që protestuesit përcollën dje ishte i qartë:

“Kur polici na drejton thikën, kush duhet të na mbrojë? Kjo është një vijë e kuqe që nuk mund të kalohet dhe nuk mund të falet.” Protestuesit nuk do të tërhiqen dhe se protestat do të vijojnë deri në largimin e sektit Rama dhe më tej.Detyra jonë, si deputet por edhe si qytetarë të këtij vendi është mbështetja pa kushte ndaj protestës qytetare dhe respektimit të kërkesave të tyre te drejta kombétarisht dhe të ligjshme juridikisht e moralisht !