Sport

Etihad shpërthen në protesta, Manchester City ngec sërish! Haaland i mohohet goli, Fulhami merr një pikë në transfertë

Manchester City vazhdon të zhgënjejë në Premier League. Skuadra e Enzo Marescas nuk ka arritur të rikthehet te fitorja, duke u ndalur në një barazim 1-1 përballë Fulhamit në stadiumin “Etihad”. Një rezultat që ka shtuar pakënaqësinë e tifozëve vendas, të cilët në fund të takimit kanë shoqëruar skuadrën me vërshëllima dhe protesta.

Takimi nisi me një surprizë për vendasit. Fulhami kaloi në avantazh në minutën e 16-të me Rodrigo Muniz, i cili finalizoi në mënyrë të shkëlqyer një aksion të ndërtuar nga miqtë, pas asistit të Oscar Bobb. Ishte një goditje e fortë për Cityn, që e pa veten në disavantazh në shtëpi.

Manchester City reagoi dhe arriti të dërgonte topin në rrjetë me Erling Haaland, por festa e norvegjezit nuk zgjati shumë. Gjyqtari Thomas Bramall anuloi golin, duke akorduar faull ndaj portierit Bernd Leno. Vendimi u kontrollua edhe nga VAR-i dhe u konfirmua, pasi portieri konsiderohej se kishte kontrollin e topit me të dyja duart. Një episod që shkaktoi shumë diskutime dhe irritim te lojtarët dhe tifozët e Cityt.

Haaland pati edhe mundësi të tjera për të shënuar, por nuk arriti të gjente rrugën e rrjetës. Nga ana tjetër, Fulhami tregoi organizim të mirë dhe rrezikoi disa herë portën e Gianluigi Donnarummës.

Në pjesën e dytë, vendasit u hodhën në sulm në kërkim të barazimit dhe e gjetën atë në minutën e 58-të. Ishte Elliot Anderson ai që realizoi një gol spektakolar me një goditje të fuqishme nga distanca, duke rikthyer baraspeshën në “Etihad”.

Në minutat e mbetura, Manchester City kërkoi me ngulm golin e fitores, por Fulhami u mbrojt mirë dhe madje pati mundësi të rrezikonte edhe në kundërsulm. Donnarumma u detyrua të ndërhynte në një rast të rrezikshëm të Muniz, duke shpëtuar skuadrën e tij nga një tjetër goditje.

Në përfundim, rezultati mbeti 1-1, ndërsa tifozët e Manchester Cityt shprehën hapur pakënaqësinë për paraqitjen e skuadrës. Ky ishte barazimi që ndërpreu serinë e tri humbjeve radhazi në kampionat, por City tashmë ka katër ndeshje pa fitore në Premier League.

Një rezultat historik për Fulhamin, i cili arriti të marrë pikë në “Etihad” pas 20 humbjesh radhazi ndaj Manchester Cityt. Ndërkohë, skuadra e Marescas duhet të reagojë sa më shpejt nëse dëshiron të mbetet në garën për kreun e kampionatit.

Rezultati përfundimtar: Manchester City 1-1 Fulham

  • 16′ Rodrigo Muniz (Fulham)

  • 58′ Elliot Anderson (Manchester City)