SPAK zbardh detaje: Lokali në Dobraç me armë dhe kitare në mure, aty shkonte Safeti dhe grupi “Bajri”!
Një dosje e SPAK-ut që hedh dritë mbi përplasjet e rënda në Shkodër.
Një lokal në zonën e Dobraçit në Shkodër, i konsideruar prej kohësh si territor i njerëzve të afërt me Safet Bajri, del në qendër të dosjes së SPAK-ut si një ambient i mbushur me armë dhe i frekuentuar nga emra të njohur të botës së krimit.
Sipas materialeve hetimore, në dosje janë përfshirë edhe foto ku duken armë të llojeve të ndryshme të ekspozuara në muret e lokalit. Hetuesit pretendojnë se ambienti frekuentohej nga Izmir Sakicaj, Samuel Troshani, Safet Bajri, i njohur edhe me mbiemrin Rustemi, si dhe persona të tjerë të lidhur me grupin.
Në të njëjtën dosje, Sakicaj, Troshani dhe Franko Lela akuzohen si organizatorë të tentativës për vrasjen e Aleksandër Prendi në gusht të vitit 2024 në fshatin Rranxë të Bushatit.
Hetimet tregojnë se ngjarja nuk përfundoi siç ishte planifikuar, por u kthye në një përplasje të armatosur, pasi Prendi dyshohet se kishte organizuar pritë ndaj personave që kishin shkuar për ta ekzekutuar.
