“Telefonat e artë” me vlerë 300 mijë paund dhe rekrutimet në TikTok, si po zgjerojnë aktivitetin bandat shqiptare në Britani
Një investigim i publikuar nga Sky News ka zbuluar mënyrën se si funksionojnë rrjetet shqiptare të trafikut të kokainës në Britaninë e Madhe, duke dokumentuar rekrutimin e shpërndarësve përmes TikTok-ut, shitjen e telefonave me klientelë të gatshme dhe lidhjet e mundshme me trafikimin e emigrantëve.
Hetimi, i realizuar pas një pune gati njëvjeçare me gazetarë të infiltruar, ka zbardhur mekanizmat që përdorin këto grupe për të zgjeruar aktivitetin e tyre në disa qytete britanike.
Rekrutimi i shpërndarësve përmes TikTok-ut
Sipas investigimit, grupet kriminale publikojnë në TikTok njoftime që paraqiten si oferta pune me paga të larta. Në disa raste kërkohen shoferë, të cilëve u premtohen akomodimi dhe karburanti i paguar, ndërsa në realitet puna lidhet me shpërndarjen e kokainës.
Në qytetin e Exeter, një gazetar i infiltruar u takua me një person të identifikuar si “Leo”, i cili i ofroi strehim, listën e çmimeve të drogës dhe mundësinë për të nisur punën menjëherë.
Në një tjetër rast, në Wigan, gazetarit iu ofruan 280 paund në ditë për shpërndarjen e kokainës.
Telefonat që shiten deri në 300 mijë paund
Një nga zbulimet më të veçanta të investigimit lidhet me të ashtuquajturit “deal phones”, telefona që përdoren për të marrë porosi nga klientët e drogës.
Këto pajisje kanë një bazë të konsoliduar klientësh dhe konsiderohen si biznese të gatshme për t’u marrë në dorëzim. Drejtuesit e rrjeteve marrin porositë përmes telefonit dhe më pas udhëzojnë shpërndarësit se ku duhet të dorëzojnë kokainën.
Gazetarët zbuluan se një telefon i tillë reklamohej në TikTok për 300 mijë paund. Vlera e tij lidhet me numrin e klientëve dhe volumin e porosive që mund të gjenerojë.
Për të treguar shpejtësinë e këtij aktiviteti, gazetari porositi kokainë në Royal Tunbridge Wells dhe iu premtua se droga do t’i mbërrinte në adresë brenda 30 minutash.
Lidhjet me trafikimin e emigrantëve
Investigimi zbuloi gjithashtu lidhje të mundshme mes disa rrjeteve të trafikut të drogës dhe atyre të kontrabandimit të emigrantëve.
Në një njoftim të publikuar në TikTok në gjuhën shqipe ofrohej transportimi drejt Evropës i personave që kishin probleme me autoritetet britanike.
Gazetarit të infiltruar iu ofrua mundësia për të nxjerrë nga Britania një person të kërkuar nga policia, duke e transportuar me kamion kundrejt pagesës prej 2,500 paundësh.
Furnizimi direkt nga Amerika e Jugut
Sipas investigimit, disa organizata kriminale shqiptare kanë krijuar lidhje të drejtpërdrejta me furnizuesit e kokainës në Amerikën e Jugut, duke shmangur ndërmjetësit evropianë.
Përfaqësues të Agjencisë Kombëtare të Krimit në Britani kanë paralajmëruar për fuqinë ekonomike dhe organizimin e këtyre rrjeteve, si dhe për lidhjet e tyre me aktivitete të tjera kriminale.
Ish-oficeri britanik David McKelvey ka ngritur shqetësimin edhe për dhunën që shoqëron këto organizata, duke përmendur rrëmbimet, torturat dhe vrasjet në luftën për kontrollin e tregut të drogës.
Investigimi i Sky News thekson se aktivitetet e dokumentuara u përkasin grupeve të caktuara kriminale dhe nuk përfaqësojnë komunitetin shqiptar që jeton dhe punon në Britani.


