Pastruan 14 milionë euro përmes shufrave të arit dhe pasurive të paluajtshme, antimafia italiane godet organizatën shqiptare të kokainës
Një organizatë kriminale e përbërë kryesisht nga shtetas shqiptarë është goditur nga autoritetet italiane, në kuadër të operacionit të koduar “Caveau 38”. Grupi dyshohet se drejtonte një rrjet ndërkombëtar të trafikut të kokainës dhe pastrimit të parave, që shtrihej në Shqipëri, Itali, Holandë dhe Gjermani.
Sipas hetimeve të Drejtorisë së Antimafias së Milanos, organizata dyshohet se ka trafikuar rreth 240 kilogramë kokainë dhe ka mbledhur e transferuar mbi 14 milionë euro në para të gatshme gjatë periudhës 2019–2022.
Operacioni është zhvilluar nga Guardia di Finanza në Lecco, nën koordinimin e Drejtorisë së Antimafias dhe në bashkëpunim me autoritetet shqiptare, përfshirë SPAK-un.
Skema e pastrimit të parave përmes arit dhe pronave
Hetuesit kanë zbuluar se paratë e përfituara nga aktiviteti kriminal pastroheshin përmes disa mekanizmave financiarë. Një pjesë e tyre përdorej për blerjen e shufrave të arit, ndërsa pjesa tjetër investohej në pasuri të paluajtshme.
Konkretisht, autoritetet kanë dokumentuar blerjen e afro 8 kilogramëve shufra ari, përmes një kompanie që operonte në sektorin e përpunimit të metaleve të çmuara, me seli në Milano dhe Alessandria. Sipas hetimeve, ari përdorej si një mënyrë për të fshehur origjinën e parave të përfituara nga trafiku i drogës dhe më pas dërgohej drejt Shqipërisë.
Një tjetër kompani me aktivitet në Lecco dyshohet se shërbente si një lloj “kasaforte” financiare për organizatën, duke investuar paratë në sektorin e pasurive të paluajtshme. Për kompanitë e përfshira janë marrë masa sekuestroje dhe është caktuar administrator gjyqësor për të garantuar vijimësinë e aktivitetit dhe mbrojtjen e punonjësve, të cilët sipas hetimeve nuk kishin dijeni për veprimtarinë e paligjshme.
52 persona nën hetim, 6 të arrestuar
Në kuadër të operacionit “Caveau 38”, gjithsej 52 persona janë vënë nën hetim për aktivitetet e dyshuara kriminale të zhvilluara gjatë viteve 2019–2022.
Gjatë aksionit, autoritetet italiane kanë arrestuar në flagrancë gjashtë persona, ndërsa kanë sekuestruar mbi 1.5 milionë euro para të gatshme dhe rreth 32 kilogramë lëndë narkotike, mes tyre kokainë, heroinë dhe marijuanë.
Hetimi është mbështetur edhe në përdorimin e komunikimeve të koduara, përmes të cilave anëtarët e organizatës dyshohet se koordinonin transaksionet e drogës dhe lëvizjen e parave.
Prokurori i Milanos, Marcello Viola, ka konfirmuar se hetimi është zhvilluar përmes një ekipi të përbashkët hetimor me SPAK-un në Tiranë, duke evidentuar bashkëpunimin mes autoriteteve italiane dhe shqiptare në luftën kundër trafikut ndërkombëtar të drogës dhe pastrimit të parave.
Hetimet vijojnë për të zbardhur plotësisht rrjetin kriminal, mënyrën e funksionimit të tij dhe destinacionin e parave të përfituara nga aktiviteti i paligjshëm.
